Cejna Newrozê bi coşek mezin li Brukselê hat pîrozkirin

به‌ڕێوه‌چوونی ئاهه‌نگی جێژنی نه‌ورۆز له‌ وڵاتی بلژیک

07-01-1391

ک/مــــــــــیدیا: رێوڕه‌سمی جێژنی دێرینی کوردان به‌ به‌شداریی سه‌دان که‌س له‌ هاووڵاتییان کورد و بیانیی دانیشتووی ئه‌و وڵاته‌، له‌ شاری برۆکسێل به‌ڕێوه‌چوو.

به‌پێی هه‌واڵی گه‌یشتوو به‌ ماڵپه‌ڕی کوردستان میدیا، رێکه‌وتی 6ی خاکه‌لێوه‌ی 1391ی هه‌تاوی، ئاهه‌نگی جێژنی نه‌ورۆزی کوردان له‌لایه‌ن نوێنه‌رایه‌تیی هه‌رێمی کوردستان و پارته‌ سیاسییه‌کانی کوردستان، به‌ به‌شداریی ده‌یان که‌سایه‌تیی سیاسی و مه‌ده‌نیی بلژیکی و هه‌روه‌ها سه‌دان کوردی هه‌ر چوار پارچه‌ی کوردستان به‌ڕێوه‌چوو.

ئه‌و جێژنه‌ له‌لایه‌ن نوێنه‌رایه‌تیی حکوومه‌تی هه‌رێمی کوردستان، پارتی دێموکراتی کوردستان، یه‌کیه‌تیی نیشتمانیی کوردستان و حیزبی دێموکراتی کوردستانی ئێران له‌ وڵاتی بلژیک رێکخرابوو که‌ له‌گه‌ڵ پێشوازیی گه‌رمی کوردان و خه‌ڵکی بیانی به‌ره‌وڕوو بوو.

رێوڕه‌سمه‌که‌ به‌ خوێندنه‌وه‌ی سروودی نه‌ته‌وایه‌تیی "ئه‌ی ره‌قیب" ده‌ستی پێکرد و دواتر په‌یامی نوێنه‌رایه‌تیی هه‌ر چوار رێکخه‌ری رێوڕه‌سمه‌که‌ له‌لایه‌ن نوێنه‌رانیانه‌وه‌ خوێندرایه‌وه.

رێوڕه‌سمه‌که‌ به‌ گۆرانیی هونه‌رمه‌ندان دڵشاد زاخۆیی، چۆپی فه‌تاح و نیاز شه‌یدا و شایی و گۆڤه‌ندی به‌شداران کۆتایی پێهات.

http://www.kurdistanmedia.com/kurdi/nws/file/801330073.php

Li Sûriyê komkujî berdewam e û azadî nêzîk

Azad Kurdî

azadpress78@hotmail.com
Şoreşa li Sûriya salek derbas kir û ket nava sala duyemîn. Rewşa hundirê Sûriyê û komkujiya ji aliyê rejîma Beşar Esed ve ber bi aloziyeke bi tirs ve diçe. Her diçe hejmara kuştî, birîndar û girtiyan bêhtir dibe. Salek xebat û berxwendan li hemberî hikûmetek dîktator ku bi darê zorê rojên dawiya temendê desthilatdariya xwe derbas dike. Ligel hewldan û hişyarîdan û gefên welatên mezin ên cîhanê derbarê komkujiya hevwelatiyên sivîl ûş nerazî ji aliyê rejîma Sûriyê, lê hêj tu gavek pratîkî ji aliyê hêzên meizn ên cîhanê nehatiye avêtin û gelên Sûriyê bi xwe li xwe xwedî derketine û dixwazin bi dana nirxên giran jî be azadiyê bînin welatê xwe û dawî li sîstema dîktatorî bînin.


Herçiqas Rûsya ji aliyekê û Neteweyên Yekbûyî û Komkara Erebî ji aliyekî din û ji hêla din ve jî eniya rojava bi serkêşiya Amerîka bi armanca bidawîanîna karên tundûtîjiyê û pêşîgirtin ji komkujiya hevwelatiyên sivîl, herwiha dîtina çareseriyeke siyasî ji bo kirîza li Sûriyê di hewldanan de ne, lê êrîşên artêş û hêzên ewlekariyê yên Sûriyê bi ser çend bajaran de berdewam in û hejmara kuştiyan ji 7 hezar kesî derbas bû. Rejîma Sûriyê bi piştgermiya Rûsyam Çîn û Îranê berdewam e lis er komkujiyê. Her diçe rojeva navxweyê Sûriyê dijwartir dibe. Encûmena Niştimanî ya Sûrî mezintirîn û giringtirîn hêza oposîsyonê ya Sûriyê ye û Encûmena Niştimanî ya Kurdî li Sûriyê (ENKS) duyemîn civata giring û ciddî a opozîsyona Sûriyê ne, nakokî û dijheviyên destpêkê di navbera hêzên Ereb bi hemû hêlên fikrî û herwiha hêzêzn Kurdî ji aliyekî din kêmtir bûye. Lê di vê rewşa ciddî ku Sûriye pê re derbas dibe, car din netifaqî û dijhevî û parçebûn di nav van her du civatên bi bandor de tê dîtin. Bi taybet pirsgirêka ku niha di navbera PYD û ENKS de heye û hêj bê çareserî maye. Heta niha hêzên ereb bi hev re û hêzên Kurdî yên opozîsyonê jî bi tevahî ne li ser hev in û ji ber vê yekê ew nikarin hevkariyeke baş bi hev re bikin û xebata azadîxwaziya gelên Sûriyê bi başî kanalîze bikin.
Di vê navberê de çavnihêriyek bêhtir ji hêzên kurdî yên opozîsyona Sûriyê tê kirin, yekîtî û tebahiya xwe xurttir bikin û hevdeng derkevin qada siaysî a Sûriyê. Opozîsyona kurdî li Sûriyê hêj hemû nakokî û dijheviyên navbera xwe çareser nekirine. Lê ji berê pirr bêhtir çûne pêş. Lê têr nake, çavnihêrî ji vê yekê zêdetir in, ji ber ku diviya ew azmûnên welatên din ên herêmê li ber çavan derbas bikin.

Pêkhatina kongreya dostên Sûriyê li welatê Tûnisê di daziya meha borî û rojeva civînê û hevdîtinan moral û hêviyên xelkê Sûriyê bêhtir û geştir kir. Xala giring a wê civînê tekezkirin li ser çespandin û bicihkirina mafên Kurdan di destûra nû a Sûriyê de bû û çareserkirina pirsa Kurd li wî welatî bû.

Aliyek balkêş a şoreşa gelên Sûriyê ev e ku ev dema salekê ye ku xelkê Sûriyê dixwaze bi awayekî aştiyane û demokratîk di çarçoveya xwepêşandan û mezên sivîl de şoreşa azadîxwaziya xwe ser bixin, lê hêzên leşkerî yên hikûmeta Sûriyê her di kuştina hemwelatiyan de berdewam in û êdî rojeva medyayên cîhanê herî zêde bûye pirsên navxweyê yên Sûriyê û komkujiya hikûmeta wî welatî. Heta reaksyon û tevgerên hikûmeta Beşar Esed bi vî awayî bimeşin û bersiva xwestekên aştiyane û demokratîk ên gelên Sûriyê bi tundûtûjî û kuştinê bê dan, xelk mukirtir dibe û roja azadiyê nêzîk û rûxandina sîstema dêktatoriya Beesê li Sûriyê kintir dikin.

Ev nivîsar di hejmar 179 a Agirî de hatiye belavkirin.

Newroza we pîroz be

Newroz, cejna kevinar û dîrokî ya Kurdan û çendîn gelên Rojhilata Navîn pîroz dikim. Bi hêviya bicih hatina aştî, azadî û ewlehî û wekheviyê û herweha jiyanek şa û bextewerane bo hemû kes û neteweyan di sala nû û Newrozên pêşiyê de.
Azad Kurdî

Çend milyon zarokên Kurd li Îranê ji mafê zimanê zikmakî bêpar in

Azad Kurdî

Rûdaw

Hatina roja 21’ê Sibatê ‘Roja Zimanê Zikmakî ya Navneteweyî’, îsal jî pirsgirêka qedexebûna zimanan li welatên pirneteweyî rojev bi xwe re mijûl kir. Hê jî bi dehan milyon zarokên neteweyên Îranê û zarokên Kurd jî di nav de, ji xeynî Farisan ji mafê xwendin û nivîsîn bi zimanê xwe yê dayîkê bêpar in.

Hevdem ligel seranserê cîhanê, her sal 21’ê Sibatê ‘Roja Zimanê Zikmakî ya Navneteweyî’ ji aliyê neteweyên Îranê û Kurd jî di nav de, tê bibîranîn û çalakiyên cuda û piralî tên organîzekirin. Ji bo ku bala desthilatdarên Komara Îslamî û navendên biryarder ên navneteweyî û demokrat û mirovdost bikşînin ser pirsên perwerdeya zimanê zikmakî û balkişandina wan bi mafên kultûrî yên neteweyan di civakên pirçand wek Îranê de, her sal Kurdên Rojhilatê Kurdistanê jî 21’ê Sibatê bi gireseyî û coşek mezin pîroz dikin. Kurd 33 sal in ku doza mafên neteweyî dkin ku herdem mafê xwendin û nivîsîn bi zimanê Kurdî yek ji wan bûye. Lê mixabin rayedarên Komara Îslamî zêdeyî 30 sal in ku vê mafê demokratîk û serek ji zarokên Kurd û neteweyên din ên Îranê bêpar û qedexe kiriye. Ligel ku madeya 15 û 19 a qanûna bingehîn a Îranê ew maf fermî nas kiriye, lê di pratîkê de qet nehatiye cîbicîkirin.

Bi milyon zarokên Kurd li Îranê neçar in ji destpêka roja diçin dibistanê heta dawiya xwendin û piştre di civakê de, bi zimanê Farsî bixwînin û binivîsin û piştre jî pê kar bikin. Rayedarên hikûmeta Îranê di bingeh de bawerî bi vê yekê nebûne ku Îran welatek pirçandî, pirzimanî û pirneteweyî ye û ji ziman û çanda neteweyên cuda pêk tê. Li hember vê yekê siyaseyta cudahîdanîn û asîmîlasyona zimanên din girtin pêşberî xwe ku ji dema desthilatdariya Mihemedriza Şah ve tovê wê hat rijandin. Mihemedriza Şah bi armanca avakirina dewleta neteweyî li Îranê hevdem ligel Ata Turk, hemû çand û zimanên neteweyên Îranê kirin armanca bişaftin û siyaseta asîmîlasyona sîstematîk ku rayedarên Komara Îslamî piştî şoreşa 1979’an ku desthilat li Îranê girtin dest xwe, şopa hikûmeta berê berdewam kirin.

Di rewşekê de ku me sedsala 21’an destpê kiriye, hêj civaka mirovahiyê ligel diyardeyek wek bişaftina ziman û çanda neteweyan ji aliyê desthilatdarên nasyonalîst ve rûbirû ye û hewla ji holê rakirin û asîmîlekirina ziman û nasnameyan neteweyên welatê xwe didin. Di ti welatek cîhanê de tenê bi zimanekê nayê xeberdan û nivîsîn, loma ligel ku li piraniya welatên demokratîk ên cîhanê ku di asta medya, perwerde û karûbarên rêveberiyê de zimanek fermî hene, lê balê didin zimanên din ên gelan û mafê grûbên civakî û kêmaniyên neteweyî jî bo xwendin û nivîsîn bi zimanê xwe yê zikmakî berçav digirin. Bo nimûne li Hindistanê ku sîstemek federal heye, zêdeyî 26 zimanên fermî hene, welatek yekparçe ye jî.

Li Îranê ku 33 sal in Komara Îslamî desthilatdariyê dike, bi awayên cuda cuda mafên çandî û nasnameya neteweyan tê binpêkkirn û ji aliyê dezgehên ewlekarî û leşkerî ve xebat û hewildanên çalakvanên siyasî û sivîl wek tawanek mezin tê zanîn. Cezayên giran ji van kesan re tê dan û ligel rewşek trajîdîk di jiyana xwe de rûbirû dibin, bi sedema ku doza mafê xwezayî û destpêkî yê xwe kirine.

Hemû peymanameyên navneteweyî mafê axavtin û xwendin û nivîsîn bi zimanê zikmakî ji neteweyekê re azad dizane, heta mafê neteweyan heye ku mafê han ji aliyê dewletan jî bi fermî were naskirin. Li Îranê zimanên neteweyan wek devokên zimanê Farisî tên binavkkirin û netewe jî wek ‘QEWM’ tê naskirn. Kurd û neteweyên din li Îranê nikarin zimanê xwe yê zikmakî di medya, çapemenî û sîstema perwerde û kar û çalakiyên civakê û pergala rêveberiyê de bikar bînin û wek kirîzek siyasî û pirsgirêkek berçav a civakî xuya dike.

Hikûmeta bê pêgeh

Azad Kurdî

Serhildana berfireh ya neteweyên Îranê di zivistana 1979’an de bû mijara herî giring a rojev navxwe, navçe û asta navneteweyî. Gelên têhniyê azadî û demokrasiyê li seranserî Îranê şoreş bi bedelên giran û xwîna sor ser xistin. Lê encama wê şoreş û serhildana azadîxwazane û rizgarî ji destê rejîma dîktatoriya Şahenşahî, berevajî vîn û xwesteka gelên Îranê derket.

Mirov dikare bêje ku nemana hikûmeta Şahenşahî, welatên Rojava ku wê demê rikeberiyek xurt bi Bilûka welatên Sosyalîsît re hebûn, ji bo ku alternatîvek baş bo parastina berjewendiyên xwe li hemberî eniya sosyalîstî di Îranê de peyda bikin, tedbîr kirin ku sîstemek olî li Îranê bînin ser kar, da ku pêşiya pêşdeçûna Komunîzmê bo Rojhilata Navîn bigire. Xomeynî û dar û destekên wî alternatîva herî baş bûn ji bo Eniya Kapîtalîsî ku derxin qadê û anîn jî. Ji xwe viyan, îrade û xwestekên neteweyên Îranê ku şoreş kiribûn û çi dixwestin, ji wan re ne giring bûn.

Zêdeyî 30 sal ji temenê Komara Îslamî ya Îranê re derbas dibe. Hikûmetek ku bingeha dîktatoriyeta xwe di referandoma rûyekî ya Adara 1980’an de stand. Ji ber ku di wê pêngava ne demokratîk ya rejîma Xomeynî de ti alternatîvek nû ji xeynî hilbijartina rejîma dîktator a berê û Hikûmeta Îslamî ya nû nebû! Rojhlatê Kurdistanê bi pêşengiya PDKÎ ew referandom boykot kir û tê de beşdarî nekir. PDKÎ yekemîn û take partiya siyasî bû wê demê ku naverok û cewhera rejîma Xomeynî bi başî nas kiribû. Sedem jî ew bû u rejîma nû ti giringî û baldanek nedida xwestekên neteweyî û demokratîk yên neteweya Kurd ku bi awayekî sivîl û aştrîxwazane dianîn holê. Siyaseta dewleta Xomeynî jî red û înkarkirina mafên Kurdan bû.

Hikûmeta olî ya Xomeynî piştî ku hêdî hêdî bingehên xwe xurt kir, dest bi mîlîtarîzekirina hemû navçeyaên Îranê kir, bi taybet deverên wek Kurdistan ku tevgera neteweyî tê de çalak bû û doza mafê Kurdan û çareserkirina pirsa Kurd di çarçoveya Îranê de dikir. Dehan sazî û dezgehên leşkerî û ewlekariyê hatin avakirin. Atmosfera welat ji wê demê heta niha li Kurdistanê û gelek deverên cihê niştecihbûna neteweyên Îranê ewlekarî û mîlîtarîzekirî ye. Dirûşmîn serxwebûn, azadî û edaleta civakî ku sloganên berçav ên rejîma nû bûn, niha êdî bi tevahî avala bûne û bûne fosîl! Ne wekhevî û gendelî di 33 sal temenê Komara Îslamî bêdadê dike, li gor serhejmariyê navneteweyî, Komara Îslamî yek ji pergalên herî gendel di cîhanê de ye. Dengê hemû liv û tevgerek demokrasîxwazane û mafxwa zane bi serkut û qirkirina sîstematkî hat/tî dan. Her diçe valahiyek zêde dikeve navbera xelkê û rejîmê, ji ber ku ti guhertin û xwestekek siyasî, aborî, civakî û çandî ku gelên Îranê jê re şoreş kiribûn, nehatine cîh. Berevajî wê, atmosfera tirs, xof û bêdengiyê li ser civakê hat ferzkirin. Hemû pîvan û mercên sîstemek demokratîk hatin piştguh xistin û azadiyên demokratîk niha piştî 33 salan ji bo gelên Îranê bûne xewn û xeyal...

Di 33 salên borî de hemû metod û rêbazên ne demokratîk ji aliyê rayedarên vê hikûmetê ve hatin rêvebirin. Komara Îslamî tu nirx û bihayek nedaye û nade îrade û dengê neteweyên Îranê. Dehan dezgehên ne hilbijartî û ferzkirî ji aliyê serokê olî hatin avakirin ku ew ji xelkê re diyar dikin ku rêveberî çawa dibe û kî dibe. Li gor wan, tenê Meleyên olî karîna diyarîkirina çarenûsa xelkê hene û ji wan re biryarên çarenûssaz bidin, xelk ne balix e û ne xwediyê wê hişmendiyê ye ku bikare çarenûsa xwe bi destê xwe diyar bikin!

Bi vî awayî Komara Îslamî rewatiya xwe ji xelkê wernagire, ji ber ku îradeya giştî ji wan re ne giring e. Karnameya 33 salên borî vê yekê diselimîne û nerazîbûnên veşartî yên sivîl û xurt ên civatên xelkê li Îranê vê yekê derdixe holê. Ev ne îdea ne. Gelên nerazî ji her derfetek biçûk ku di sîstema dîktator û qirker a Komara Îslamî de pêk tê, dengê xwe diherikînin û doza maf û azadiyên xwe yên ji destçûyî dikin û nerazîbûn û dijberiya xwe ligel tewahiya sîstema Komara Îslamî pêşan didin.

Bûyerên sala borî di welatên Ereb ên Rojhilata Navîn de, wisa pêşan didin ku encama wê bahozê bi têkçûna rejîma Esed li Sûriyê û Komara Îslamî li Îranê bi destê gelên nerazî bi dawî dibe. Ji ber ku hikûmetek ku pêgeha cemawerî di nav gelan de tunebe û berheqî û rewatiya xwe ji dengê gelan û viyana wan nestîne û nekeve ber proseya demokratîk a hilbijartina azad, nikare zêde temenê desthilata xwe berdewam bike.

çavkanî: Duheftînameya Agirî hejmar 177



Azad Kurdî: Gelên Îranê li Parlemanê Bêhêvî Bûne

Çarşembî, 22 Meha Du 2012

Azad Kurdî: Gelên Îranê li Parlemanê Bêhêvî Bûne

Hevpeyvîn - Ahmed Barzanî


Hilbijartina parlemana Îranê li roja 2’ê Adarê birêve diçe, di demekê de ku piranîya partîyên Kurdî daxwaza boykotkirina dengdanê dikin.

Azad Kurdî, rojnamevan û endamê rêveberîya Civaka Aştî û Pêşveçûna Kurdistanê, dibêje ku gelên Îranê bêhêvî bûne ku xwestek û daxwazên xwe di parlemanê de bi cîh bînin.

Birêz Kurdî herwiha pêşbînî dike ku herî zêde, rêjeya dengderên Îranê li sedê 20 derbaz nebe.

Jibo guhdarîkirina hevpeyvîna hevkar Ahmed Barzanî bi birêz Azad Kurdî re, lînka ‘Guhdarî kirin’ li rexê rastê vê rûpelê kilik bike.

http://www.voanews.com/kurdi/news/Kurdi_2_22-140005253.html

Kurdistan û hilbijartinên meclîsa nehem

Azad Kurdî

 

Di nivîsara hejmara berê de, me qala giringiya hilbijartinan di çarçoveya sîstemek demokratîk de kir û herwiha me çawaniya rêveçûna hilbijartinan di sîstema Komara Îslamî ya Îranê de şirove kir. Di vî nivîsarê de emê li ser rojeva hilbijartinên gera nehem a Meclîsa Şêwra Îslamî ya Îranê li Rojhilatê Kurdistanê, bi kurtî jî be bisekinin.

Du mehan berî destpêbûna navnivîsîna berbijarên gera nehem a hilbijartinên Meclîsa Şêwra Îslamî ya Îranê, piraniya rêxistin û partiyên siyasî û sivîl ên Kurd, di daxuyaniyên cuda û hevbeş de, hilbijartinên vê gera Meclîsa Îranê boykot kirin. Hêzên siyasî yên Rojhilatê Kurdistanê hilbijartin di çarçoveya Komara Îslamî û qanûnên wê de ne demokratîk dizanin û berevajî rêbaz û pîvanên demokratîk û demokrasiyê şirove dikin.

Her wek çavdêrên siyasî berî destpêbûna proseya navnivîsîna berbijarên gera nehem a hilbijartinên Meclîsa Îranê pêşbînî dikirin, vê carê hikûmetê piraniya nûnerên rexnegir yên heta ku niha di meclîsa heştem de parlamenter in û herwiha kesên ne girêdayî dewletê ku nû xwe berendam kiribûn, ji beşdarîkirin di prosesa hilbijartinan de bêpar kirin. Konseya Parêzvan (Şêwra Nobedar) ku ji Meleyên tundrew û girêdayî serokê olî yê rejîmê pêk tê, kêrhatîbûna berbijarên hemû hilbijartinan li Îranê kontrol dike û dinirxîne, kesên naskirî, cihê baweriya xelkê û rexnegir nayên qebûlkirin û ji mafê berbijarbînê tên bêparkirin.

Lê vê carê zêdeyî nûnerên Kurd ên bajarên Rojhilatê Kurdistanê ku niha di Meclîsê de ne, ligel gelek kesayetiyên naskirî û cihê baweriya neteweya Kurd ku nû xwe berbijar kiribûn, hatin redkirin. Ev pêngava Konseya Parêzvan a Komara Îslamî ya Îranê bû sedem, ev rêjeya kêm a xelkê ku berê li Kurdistanê di hilbijartinan de beşdarî dikirin, tevlî enî û kampanya boykotê bibin. Ji xwe çendîn sal in, neteweya Kurd li Rojhilatê Kurdistanê ji ber ne demokratîkbûna hilbijartinên ku di sîstema Komara Îsêamî ya Îranê de tên rêvebirin, boykot dikin.

Eniya Yekgirtî ya Kurd ku saziyek qanûnî ya Kurdan e li Îranê, hilbijartin boykot nekirin! Vê carê çend berbijar dan naskirin, lê hemû berendamên vê rêxistinê jî hatin redkirin û nikarin tevlî kampanya hilbijartinan bibin ku biryare di meha Adara 2012’an de rêve biçin.

Herwiha ligel nûner û bernedamên Kurd, nûnerên rexengir û nerazî û kesayetiyên naskirî yên neteweyên din ên Îranê jî nehatine qebûlkirin. Ji laiyekî din jî, reforxwazên nav hikûmeêt jî vê carê hilbijartin boykot kirine.

Rayedarên Komara Îslamî li vê rewşa hestyar ku herêma Rojhilata Navîn tê derbas dibe û di asta navxwe û navneteweyî de ligel kirîzên gelk cidî û xurt rûbirû bûye, ji her demê zêdetir hewceyî bi meclîsek yekdest, yekreng û hevbîr heye, da ku sîstema wan ya dîktator tekûz be û bi tebahî bikemile. Nerazîbûn û xwepêşandanên piştî hilbijartinên Serokkomariyê a 2 sal berî niha, tirs û xofek mezin derbarê egera serhildana neteweyên Îranê di dilê wan de pêk aniye. Loma hemû kesayetiyên rexnegir û nerazî û cihê baweriya xelkê vê carê ji mafê berbijarbûnê bêpar kirin. Herçiqas çûyîna wan nûneran berê jî nekarîn tu pirsirêkên siyasî, aborî, civakî û kultûrî yên neteweya Kurd û gelên din ên Îranê çareser bike. Lê vê carê ev derfeta gelek biçûk jî ji wan kesayetiyan jî standin.

Tometa ku kesayetiyên Kurd li Rojhilatê Kurdistanê pê re hatine tawanbarkirin û nehatine qebûlkirin, girêdayîbûna wan bi partî û rêxistinên siyasî yên îlegal ên Kurd hatiye destnîşankirin. Sucek ku sedan çalakvanên siyasî û sivîl li Rojhilatê Kurdistanê bi hêsanî bi vê tometê û ... bi cezayên giran ên girtîgehê mehkûm kirine û gelek jî darve kirine û dikin.

Di rewş û atmosferek wiha xurt a ewlekarî de ku li Kurdistanê heye û bi van rêbazên ne demokratîk, nehemîn gera hilbijartinên Meclîsa Şêwra Îslamî ya Îranê ligel pêşwaziyek sar a Kurdsan rûbirû dibe û boykot gelek ji berê berfirehtir dibe.

çavkanî: Duheftînameya Agirî hejmar 176